Gjatë mbrëmjes së të mërkurës, një vatër zjarri është konstatuar në venddepozitimin e mbetjeve urbane të qytetit të Vlorës. Shërbimet zjarrfikëse kanë mbërritur menjëherë në vendin e ngjarjes, ku po punojnë për izolimin dhe shuarjen e flakëve.
Sipas informacioneve, nuk raportohet për përhapjen e zjarrit përtej zonës së mbetjeve. Pavarësisht se procesi i depozitimit të mbeturinave në këtë vend është ndërprerë prej kohësh, zona vijon të mbetet një pikë kritike për autoritetet lokale.
Zjarret e përsëritura në këtë venddepozitim shkaktojnë çlirimin e sasive të mëdha të tymit, i cili paraqet rrezik për shëndetin publik të banorëve dhe turistëve. Problematika e riaktivizimit të vatrave në këtë terren theksohet veçanërisht gjatë periudhave me temperatura të larta, duke e bërë situatën sfiduese për forcat zjarrfikëse.