Pas vuajtjes së një pjese të dënimit, Rozeta Dobi është liruar këtë të mërkurë nga qelia. Ajo u bë objekt i një hetimi të gjerë në fillim të vitit 2023, kur u arrestua nën akuzën e vjedhjes së 120 mijë eurove, 30 mijë dollarëve dhe sendeve me vlerë nga banesa e ish-zyrtares së lartë, Alda Klosi, ku punonte si pastruese prej pesë vitesh.
Në vijim të hetimeve, autoritetet zbuluan shuma të tjera të konsiderueshme të fshehura në banesën e saj. Policia sekuestroi:
• 404 mijë euro, 8 500 dollarë dhe bizhuteri floriri të fshehura në tubin e aspirimit;
• 58 150 euro dhe 7 mijë dollarë shtesë;
• 368 mijë lekë;
• Tre automjete, dy prej të cilave dyshohet se janë blerë me paratë e vjedhura.
Çështja pati jehonë të gjerë në opinionin publik, jo vetëm për shkak të shumave të sekuestruara, por edhe për shkak të hetimeve shtesë mbi origjinën e këtyre mjeteve financiare. Pas lirimit nga burgu i Pojskës, Dobi përfiton nga masat e fundit të miratuara në kuadër të amnistisë penale.