Instituti Kombëtar i Shëndetësisë Publike të Kosovës (IKShPK) njoftoi se gjendja epidemiologjike në vend është karakterizuar nga një shtim i rasteve me fruth brenda periudhës njëmujore. Sipas të dhënave zyrtare, më 10 korrik ishin regjistruar 62 raste, ndërsa deri më 10 gusht shifra ka arritur në 112 të infektuar.
Sipas shpërndarjes gjeografike, komunat më të prekura janë:
• Prishtina me 37 raste;
• Fushë-Kosova me 29 raste;
• Ferizaj me 12 raste;
• Kaçaniku me 7 raste;
• Obiliqi me 6 raste.
Raste të tjera janë raportuar edhe në Drenas dhe Lipjan (nga 3 raste), ndërsa në Gjilan, Skenderaj, Shtime, Shtërpcë dhe Vushtrri janë raportuar nga 2 raste. Nga 1 rast është regjistruar në Deçan, Graçanicë, Podujevë dhe Viti. Në përgjigje të kësaj situate, autoritetet shëndetësore kanë intensifikuar fushatat e imunizimit. Gjatë javës së fundit, ekipet e vaksinimit në komunat më të prekura kanë administruar vaksinën MMR për 147 fëmijë që kishin mbetur prapa me kalendarin e rregullt të vaksinimit.
Ekspertët e IKShPK-së kanë bërë thirrje për kujdes të shtuar, duke rekomanduar që çdo person që shfaq simptoma, si temperaturë e lartë, skuqje të lëkurës, kollë, rrufë ose konjunktivit, të paraqitet sa më parë në institucionet shëndetësore. Instituti thekson se fruthi mbetet një sëmundje me infektueshmëri të lartë dhe se vaksinimi është masa më efikase dhe më e sigurt për mbrojtjen e popullatës dhe parandalimin e komplikimeve shëndetësore.
Përditësime
Instituti Kombëtar i Shëndetësisë Publike të Kosovës konfirmoi 13 raste të reja me fruth gjatë javës së fundit, duke e çuar numrin total të të infektuarve në 125. Të dhënat e përditësuara pasqyrojnë shpërndarjen gjeografike të rasteve si vijon: - Prishtina me 37 raste - Fushë-Kosova me 29 raste - Ferizaji me 12 raste - Kaçaniku me 7 raste - Obiliqi me 6 raste