Sipas të dhënave të Bankës së Shqipërisë, sektori bankar regjistroi 73.749 aplikime për kredi në gjysmën e dytë të vitit 2025. Ky numër shënoi rënie me 2,5% krahasuar me të njëjtën periudhë të vitit të kaluar, kryesisht për shkak të uljes së aplikimeve nga individët me 3,5%. Individët zinin mbi 90% të totalit, ndërsa bizneset 10%.
Aplikimet për ndërmarrjet e vogla dhe të mesme u rritën me 27% krahasuar me gjashtëmujorin e parë dhe me 14,5% krahasuar me vitin e kaluar. Për ndërmarrjet e tjera, rritja ishte 8% gjashtëmujore dhe 0,2% vjetore.
Norma totale e refuzimit arriti 31,6%, duke u rritur me 1,3 pikë përqindje nga gjashtë muaj më parë dhe me 4,1 pikë përqindje nga viti i kaluar. Kjo përkthehet në rreth 23 mijë aplikime të refuzuara. Rritja ishte më e theksuar te individët dhe ndërmarrjet e vogla e mesme.
Bankat me kapital vendas shënuan rënie të lehtë të normës së refuzimit, ndërsa ato me kapital të huaj e mbajtën pothuaj të pandryshuar. Ndaj kërkesave të ndërmarrjeve të vogla e mesme, bankat e huaja refuzuan 21% të aplikimeve, krahasuar me 7% te bankat vendase.
Për individët, bankat e huaja ruajtën normë pothuaj të pandryshuar, ndërsa bankat vendase e rritën në 26%, nga 18% në gjashtëmujorin e parë dhe 9% një vit më parë. Të dy grupet bankare vazhduan politikën shtrënguese ndaj këtij segmenti.