Pas një ngadalësimi gjatë muajve prill dhe maj, të ndikuar nga situata në Lindjen e Mesme, tregu i automjeteve në Shqipëri ka shënuar rimëkëmbje në qershor. Sipas të dhënave të publikuara nga Drejtoria e Përgjithshme e Shërbimeve të Transportit Rrugor (DPSHTRR), regjistrimet për herë të parë arritën në 9,915 mjete, shifra më e lartë për këtë vit.
Në totalin e gjashtëmujorit të parë, vendi numëroi rreth 49 mijë regjistrime të reja, duke shënuar një rritje prej 3% krahasuar me të njëjtën periudhë të vitit 2025. Ky rezultat renditet si niveli i dytë më i lartë historik, pas rekordit të shënuar në gjashtëmujorin e vitit 2024 me 50.3 mijë mjete. Në fund të qershorit, në vend qarkullonin gjithsej gati 1.1 milionë mjete.
Dominimi i tregjeve aziatike
Koreja e Jugut mbetet burimi kryesor i importit të automjeteve, duke zënë 25% të regjistrimeve, ose 12.3 mijë mjete për gjashtëmujorin e parë. Ky interes shpjegohet me çmimet e favorshme dhe sasinë e lartë të mjeteve të përdorura që dalin në treg për shkak të zëvendësimit të shpeshtë në këtë shtet.
Kina vijon si një destinacion i rëndësishëm, me 17% të mjeteve të regjistruara (rreth 8.2 mijë). Tregjet tradicionale si Gjermania (5,837 mjete) dhe Italia (5,650 mjete) pasojnë në listën e vendeve të origjinës. Në total, 42% e regjistrimeve për këtë periudhë erdhën nga Koreja e Jugut dhe Kina.
Trendi i makinave elektrike
Pavarësisht rritjes së përgjithshme, të dhënat tregojnë një rënie të interesit për automjetet elektrike. Në qershor, numri i tyre ishte më i ulëti për këtë vit, me 775 regjistrime, krahasuar me kulmin e muajit mars kur u regjistruan gati 1,300 mjete elektrike.