Rrjete kriminale ndërkombëtare po sjellin një numër në rritje grash nga vende të varfra si Venezuela dhe Republika Domenikane drejt Shqipërisë. Ato u premtojnë fitime nga prostitucioni dhe mundësinë për të hyrë në Europë përmes Shqipërisë si vend tranzit. Ky fenomen nxjerr në pah një hetim gazetaresk të agjencisë franceze AFP, pjesë e projektit Gen.EU për lajme cilësore mes të rinjve europianë.
Shumë gra thonë se nuk e dinin se prostitucioni është i paligjshëm në Shqipëri. Një grua nga Venezuela shpjegon: "Nuk e dija këtë. Përndryshe nuk do të kisha ardhur ose do të isha larguar menjëherë. Do të më kishte kursyer shumë kohë në burg."
Një grua tjetër nga Republika Domenikane përshkruan organizimin: "Kontaktuan me dikë dhe ai person na siguroi një vend ku të punonim. Ne i paguajmë 50% të asaj që fitojmë me trupin tonë, me shërbimet që ofrojmë."
Sipas AFP-së, gratë kanë frikë të kërkojnë ndihmë nga autoritetet për shkak të kërcënimeve nga personat që i kontrollojnë. Ligji shqiptar parashikon dënim deri në 3 vjet burg për prostitucion, nëse personi nuk njihet si viktimë trafiku.
Geranda Gjeta, komisionere e Njësisë Kundër Trafikimit të Qenieve Njerëzore në Tiranë, vë në dukje ndryshimin e trendit: "Në të kaluarën, Shqipëria ishte vend origjine për trafikimin e grave shqiptare drejt vendeve të tjera. Tani ka një ndryshim të madh: Shqipëria nuk është më vend origjine, por tranzit për shtetase të huaja që hyjnë në mënyra ligjore ose jo."