Sara Bodo, drejtoresha e përgjithshme e Agjencisë Kombëtare të Rinisë, deklaroi se praktikat e punës për studentët ekselentë përbëjnë një qasje të nevojshme për administratën publike. Kjo u shpreh gjatë një aktiviteti të organizuar nga agjencia më 4 shkurt 2026, ku morën pjesë kryeministri Edi Rama, ministri i Turizmit, Kulturës dhe Sportit Blendi Gonxhja, si dhe të rinj që përmbyllën thirrjen e 10-të të Programit Kombëtar të Praktikave të Punës.
Bodo nënvizoi se të rinjtë janë e ardhmja e vendit dhe e administratës publike. Ajo u tha atyre se kjo praktikë tremujore ka shërbyer për vendosjen e themeleve profesionale dhe njerëzore. "Ju nuk keni mësuar vetëm si funksionon administrata publike, por si funksionon përgjegjësia, korrektësia, përkushtimi dhe si ndërtohet besimi", tha ajo.
Duke iu drejtuar të rinjve, Bodo shtoi se e ardhmja që ata ndërtojnë nuk do të shfaqet menjëherë, por do të jetë e qëndrueshme. "Administrata publike është një ndërtesë e madhe që nuk mbahet nga ato mure që duken, por nga themelet e forta që nuk shihen, nga njerëz që punojnë çdo ditë me profesionalizëm dhe integritet", vijoi ajo.
Bodo theksoi se përfundimi i kësaj faze nuk shënon fundin e rrugëtimit, por fillimin e një përgjegjësie të re dhe një identiteti profesional të ri. "E ardhmja e vendit dhe administratës publike ndërtohet nga njerëz si ju", përfundoi ajo.