Tre shtetas rumunë janë shoqëruar nga autoritetet pasi tentuan të fusnin sende të ndaluara në Institucionin e Ekzekutimit të Veprave Penale (IEVP) në Pojskë të Pogradecit. Ngjarja ndodhi një ditë më parë, rreth orës 14:00, kur familjarët kishin shkuar për të takuar vajzën e tyre, e cila vuan dënimin për veprën penale të mashtrimit.
Gjatë kontrollit të çantave me rroba dhe sendeve të tjera që familjarët kishin sjellë për të dënuarën, punonjësit e institucionit konstatuan një thikë dhe një telefon celular. Pas gjetjes së këtyre sendeve, tre familjarët u shoqëruan në polici dhe u morën në pyetje në prani të avokatit, ndërsa pamjet filmike të momentit të kontrollit janë sekuestruar nga grupi hetimor.
Sipas të dhënave paraprake, ende mbetet e paqartë arsyeja e futjes së thikës, pasi e dënuara nuk njihet si person problematik dhe nuk rezulton të ketë pasur konflikte me të burgosurat e tjera. Pas ngjarjes, efektivët e burgut ushtruan kontroll edhe në dhomën ku qëndron e dënuara, por nuk u konstatua asnjë send tjetër i ndaluar. Autoritetet vazhdojnë hetimet për të zbardhur rrethanat dhe qëllimin e futjes së këtyre objekteve në ambientet e burgut.