Sipas Anketës Europiane për Kushtet e Punës, të publikuar në fund të muajit prill, Shqipëria dhe Kosova renditen mes vendeve me përdorim të lartë të inteligjencës artificiale gjeneruese në punë në Europë.
Rreth 12% e punonjësve në Bashkimin Europian përdorin këtë teknologji. Kosova zë vendin e 7-ë me 20% të punonjësve, pas Luksemburgut (25%), Zvicrës (24%), Suedisë (21%), Norvegjisë (21%), Belgjikës (20%) dhe Danimarkës (20%).
Shqipëria renditet e 11-a me 18% të punonjësve që e përdorin, në nivel të barabartë me Gjermaninë, Austrinë dhe Finlandën, por pak më poshtë se Hollandën (19%).
Në vendet e tjera të rajonit, niveli është shumë më i ulët:
- Maqedonia e Veriut, Serbia dhe Bosnjë Hercegovina: 3%.
- Mali i Zi: 10%.
Fqinjët Greqia dhe Italia regjistrojnë vetëm 5% përdorim.
Inteligjenca artificiale gjeneruese krijon përmbajtje të re si tekste, imazhe, kode apo audio, duke u mbështetur në modele të mësuar nga të dhëna ekzistuese. Kjo e dallon nga sistemet tradicionale të IA-së, që fokusohen te parashikimi apo klasifikimi. Është e dobishme në fusha si shkrimi, marketingu, programimi dhe dizajni.
Raporti nxjerr në pah dallime të mëdha mes vendeve, me nivele më të larta në shtetet më të zhvilluara, ndërsa vende jashtë Bashkimit Europian si Shqipëria dhe Kosova afrohen me to.
Përditësime
- Përdorimi i IA-së gjeneruese është më i lartë mes burrave se mes grave.
- Punonjësit më të rinj përdorin më shumë IA gjeneruese se ata më të moshuar.
- Portugalia dhe Rumania regjistrojnë nivele shumë të ulëta, 5% ose më pak.