Në vitin 2025, Shqipëria importoi rreth 740 mijë ton naftë, sipas të dhënave të Doganave. Kjo shifër reflekton rritjen e vazhdueshme të importeve për shkak të shtimit të konsumit nga turizmi dhe numrit të lartë të automjeteve në qarkullim.
Çmimi i naftës në vend u rrit në 200 lekë për litër nga 175 lekë në fund të shkurtit, si pasojë e tensionëve në Lindjen e Mesme që ndikuan bursat ndërkombëtare.
Burimi kryesor ishte Arabia Saudite, nga ku u furnizuan 257 mijë ton ose 35% e totalit. Kryesisht Kastrati Energy Trade, importuesi më i madh, dhe Gega Oil, i dyti më i madh, importojnë nga ky shtet. Arabia Saudite është prodhuesi i dytë më i madh botëror pas Shteteve të Bashkuara, me prodhim 9-11 milionë fuçi në ditë sipas OPEC.
Shteti i dytë është India, me 16% të importeve. Edhe pse nuk prodhon naftë bruto në sasi të mëdha, ajo përpunon naftë nga tregje të ndryshme dhe e eksporton si produkt të rafinuar drejt Europës. Peshën kryesore e importeve nga India e mbajnë Kastrati Energy Trade dhe Gega Oil.
Rreziku nga bllokimi i Kanalit të Suezit
Nafta arrin në Shqipëri kryesisht përmes Kanalit të Suezit. Importuesit thonë se një bllokim do të detyronte anijet të devijonin rreth Afrikës, duke shtuar 20 ditë kohë udhëtimi dhe kosto shtesë.
Aktualisht, kanali është i hapur dhe funksional, por trafiku është i reduktuar ndjeshëm. Shumë kompani po shmangin kalimin për shkak të rrezikut në Detin e Kuq dhe po zgjedhin rrugën rreth Afrikës.