Në Shqipëri, numri i nxënësve në arsimin fillor ka vazhduar të bjerë gjatë vitit 2024. Nga 146 962 nxënës të regjistruar në vitin 2023, shifra ka zbritur në 141 089 nxënës, duke reflektuar një tendencë rënëse që prek veçanërisht sistemin arsimor publik. Në institucionet publike, numri i nxënësve ra nga 130 067 në 123 491, duke përfaqësuar një tkurrje prej rreth 5.1%. Në të kundërt, sektori privat ka ndjekur një prirje të kundërt, duke rritur numrin e nxënësve nga 16 895 në 17 598, ose me rreth 4.2%.
Sipas të dhënave të Eurostat, kjo rënie në Shqipëri është shumë më e theksuar se ajo në Bashkimin Evropian, ku në vitin 2024 ishin regjistruar 23.2 milionë nxënës, me një rënie minimale prej 0.2% krahasuar me një vit më parë. Sa i përket gjinisë në profesionin e mësimdhënies, Shqipëria vijon të ketë një dominim të lartë të grave, të cilat përbëjnë 87.6% të mësuesve të arsimit fillor, ndërsa burrat zënë vetëm 12.4%.
Në nivel evropian, krahasuar me vitin 2014, numri i nxënësve është rritur me 2.9%. Shtetet me numrin më të madh të nxënësve në arsimin fillor për vitin 2024 janë Franca me 4.1 milionë, e ndjekur nga Gjermania (3.3 milionë), Spanja (2.8 milionë) dhe Italia (2.6 milionë). Gjithashtu, raporti nxënës-mësues në nivelin e Bashkimit Evropian ka shënuar rënie, duke zbritur nga 14.2 në 13.3 nxënës për çdo mësues gjatë dhjetë viteve të fundit.