Oficerët e Policisë së Lasithi në Kretë të Greqisë kanë arrestuar një shtetas shqiptar për vjedhjen e 11 000 eurove nga shoku i tij i dhomës, një shtetas egjiptian. Ngjarja ndodhi në një shtëpi në Elounda, ku jetonin shqiptari dhe dy shtetas egjiptianë, të cilët ishin njëkohësisht kolegë në një kantier ndërtimi në zonë.
Njëri nga egjiptianët raportoi në polici të martën se i ishin vjedhur paratë, të cilat i kishte fshehur në shtëpi. Edhe shqiptari pretendoi se i kishin vjedhur 400 euro të tij dhe dyshohet se deklaroi se bëhej fjalë për një vjedhje me thyerje, pasi dera ishte hapur me forcë, duke inskenuar kështu një grabitje.
Gjatë hetimit paraprak, policia mësoi se shqiptari ishte kthyer papritmas në shtëpi, duke thënë se "kishte harruar diçka". Pas analizimit të pamjeve nga kamerat e sigurisë, rezultoi se vjedhja ishte kryer nga ai dhe jo nga një person i panjohur.
Hetuesit vlerësojnë se shqiptari kishte parë vendin ku egjiptiani fshihte paratë, shfrytëzoi rastin dhe i mori ato. Atij iu gjetën rreth 8 000 euro, të cilat iu kthyen pronarit të ligjshëm. Sa i përket pjesës tjetër të parave, i arrestuari pranoi se i kishte "investuar" në lojëra fati.