Procesi gjyqësor në Dhomat e Specializuara të Kosovës për rastin e tentim-pengimit të drejtësisë ka pësuar një shtyrje. Gjyqtari i vetëm, Christopher Gosnell, ka njoftuar se dorëzimi i dosjeve përfundimtare është shtyrë, fillimisht për shkak të kërkesës së mbrojtjes së Fadil Fazliut për arsye shëndetësore, si dhe në pritje të vendimit nga Apeli lidhur me dëshminë e ekspertit të Institutit Holandez për Kriminalistikë, Koen Herlaar.
Sipas vendimit të gjykatës, palët duhet të jenë të gatshme të dorëzojnë dosjet përfundimtare jo më vonë se tri ditë pune pas njoftimit për vendimin e Apelit. Kjo dinamikë ka çuar në shtyrjen e fjalëve përmbyllëse në gjykatore për periudhën pas pushimeve verore, konkretisht nga data 17 gusht 2026 e tutje. Gjykata kishte rrëzuar më herët dëshminë e ekspertit Herlaar, i cili pretendonte se dokumentet e sekuestruara te Isni Kilaj dhe Bashkim Smakaj ishin printuar nga Hashim Thaçi, çështje e cila mbetet për t'u shqyrtuar nga Apeli.
Ndërkohë, palët kanë arritur pajtim për disa çështje ligjore. Të martën është publikuar pakoja e 10-të e fakteve të pakontestueshme. Në këtë listë përfshihen dëshmi të personave të mbrojtur, si Sokol Bashota, Ismet Tara dhe Demush Krasniqi, të cilët kanë deklaruar se nuk janë kontaktuar apo kërcënuar për të ndërhyrë në dëshminë e tyre që nga fillimi i procesit gjyqësor. Përveç të përmendurve, në proces janë të përfshirë si të akuzuar edhe Hashim Thaçi, Isni Kilaj, Bashkim Smakaj, Fadil Fazliu dhe Kuçi.