Dhomat e Specializuara të Kosovës në Hagë zhvilluan më 27 shkurt 2026 seancën me deklaratat hyrëse në gjyqin ndaj Hashim Thaçit, Bashkim Smakaj, Isni Kilaj, Fadil Fazliut dhe Hajredin Kuçit.
Prokurori Joshua Hafetz njoftoi për dëshmi të shumta kundër të akuzuarve, duke përfshirë nëntë audio-incizime nga qendra e paraburgimit në Hagë, thirrje telefonike, shkelje të urdhrave gjyqësorë dhe ekspertizë që vërteton se dokumentet e gjetura në Kosovë u printuan nga printeri i Thaçit në Hagë.
Sipas ZPS, Thaçi udhëzoi Fazliun për ndikim në dëshminë e Rrustem Mustafës-Remit, dëshmitar i tyre, në takimin e 2 korrikut 2023. Në audio-incizim dëgjohet Thaçi duke thënë: «Thuaj shkurt, po, jo, mos filozofo» dhe «Shkurt, jo 12 orë, se 12 orë pa rrëshqit diku nuk e lë».
Prokuroria shpjegoi se Fazliu, pas vizitës te Thaçi, u takua me Remin në Kosovë për t’i dhënë udhëzimet specifike. Djali i Fazliut e kishte kontaktuar Remin pesë ditë pas njoftimit të ZPS për dëshminë e planifikuar më 26 qershor. U shfaqën edhe mesazhe të shkëmbyera midis Mustafës dhe Fazliut pas kthimit të këtij të fundit në Kosovë.
Kilaj mori udhëzime nga Thaçi në Hagë për të ndryshuar dëshminë e dëshmitarit 4, një viktimë që më parë e kishte implikuar Thaçin për keqtrajtimin e anëtarëve të UÇK-së. Kuçi diskutoi me Thaçin për ndikim ndaj dy dëshmitarëve dhe një viktimë tjetër.
Hafetz theksoi se udhëzimet e Thaçit synonin dëshmitarët e brendshëm të UÇK-së dhe viktimat që përbënin kërcënim për mbrojtjen e tij në gjyqin për krime lufte.
Përditësime
Gjykatësi regjistroi deklaratat e pafajshmërisë së pesë të akuzuarve: Hashim Thaçi, Smakaj, Kilaj, Fazliu dhe Kuçi.
Hashim Thaçi akuzohet për 11 pika: 3 vepra penale kundër rendit publik dhe 8 kundër administrimit të drejtësisë.
ZPS prezantoi një audio-incizim të ri të takimit të Thaçit me Isni Kilaj dhe Vllaznim Kryeziun më 6 tetor në Hagë, ku Thaçi specifikon "Faqja 7, pjesa 6, rreshti 9" të dëshmisë së dëshmitarit 4 për korrigjim.
Thaçi e quajti qendrën e paraburgimit "qendër të pengimit", duke shkelur rregullat e konfidencialitetit.
ZPS publikoi fotografi nga bastisjet e nëntor 2023 në shtëpinë e Isni Kilajt. Aty u gjetën copëza letre të grisura, të cilat ekspertët i rikthyen në formë origjinale. Sipas tyre, ato përbëjnë deklaratën konfidenciale të një dëshmitari të mbrojtur në rastin e krimeve lufte kundër Hashim Thaçit, Kadri Veselit, Jakup Krasniqit dhe Rexhep Selimit.