Ministria e Mbrojtjes dhe Agjencia Kombëtare e Mbrojtjes Civile (AKMC) kanë përditësuar bilancin operacional të situatës së zjarreve në territorin shqiptar. Sipas të dhënave zyrtare të orës 20:00, nga 20 vatra të raportuara, 7 janë ende aktive, 3 ndodhen nën mbikëqyrje, ndërsa pjesa tjetër është shuar plotësisht. Angazhimi në terren vijon të përqendrohet në qarqet Tiranë, Dibër, Korçë dhe Durrës.
Në zonën e Dajtit, drejt Qafë-Priskës, po punohet me 15 zjarrfikës, 9 forca të Agjencisë së Zonave të Mbrojtura (AdZM) dhe 20 efektivë ushtarakë, me mbështetje ajrore. Qarku i Dibrës paraqet situatën më të angazhuar, me vatra aktive në Vajkal, Sllatinë, Lundre të Matit dhe Ballenjë të Martaneshit. Për shuarjen e flakëve në këto zona janë mobilizuar forca të shumta, përfshirë 91 forca në Sllatinë dhe 38 forca të MZSH-së së bashku me 30 efektivë të Forcave të Armatosura në Vajkal.
Në Qafën e Lugut, Vithkuq, terreni i thyer malor pamundëson ndërhyrjen direkte gjatë natës, ndaj vatra po monitorohet në distancë. Ndërkohë, zjarri në Zallë të Fushë-Krujës është vënë nën kontroll pas bashkëpunimit mes forcave zjarrfikëse, atyre bashkiake dhe 30 efektivëve të Ushtrisë. Autoritetet sigurojnë qytetarët se vatrat në Malin e Dardhës dhe Malin e Qukësit mbeten nën mbikëqyrje, ndërsa theksojnë se nuk ka rrezik të drejtpërdrejtë për zonat e banuara. AKMC vijon koordinimin me prefekturat dhe bashkitë për menaxhimin e situatës.
Përditësime
Autoritetet kanë përshkallëzuar ndërhyrjen me angazhimin e 284 forcave operacionale, 80 efektivëve të Forcave të Armatosura dhe 33 automjeteve zjarrfikëse. Operacioni ajror është forcuar përmes përdorimit të 2 helikopterëve të Forcës Ajrore. Ekipet e emergjencës konfirmuan shuarjen e plotë të vatrave në Strikçan dhe Nivicë. Ndërkohë, burime zyrtare raportuan shfaqjen e një vatre të re zjarri në zonën e Rrilës në Lezhë.
Autoritetet kanë riorganizuar përpjekjet në terren pas regjistrimit të 28 vatrave të zjarrit në 24 orët e fundit. Aktualisht, 4 vatra mbeten aktive, ndërsa 3 të tjera janë nën mbikëqyrje. Forcat operacionale janë shtuar në 330 efektivë dhe 35 automjete zjarrfikëse, ndërsa angazhimi i Forcave të Armatosura është reduktuar në 50 efektivë dhe 1 helikopter. Vatra të reja janë identifikuar në qarqet Dibër dhe Elbasan, përkatësisht në Librazhd dhe Prrenjas. Në të njëjtën kohë, situata është përmirësuar ndjeshëm në Malin e Dajtit dhe Qafë-Mugë të Fushë-Arrëzit.