Superjahti Deep Blue, një ndër mjetet lundruese më të reja dhe më luksoze në botë, është ankoruar në Portin e Durrësit. Ky superjaht është prodhuar nga kantieri gjerman Lürssen gjatë vitit 2026 dhe lundron nën flamurin e Ishujve Kajman. Sipas të dhënave, mjeti ka një vlerë prej 450 milionë dollarësh dhe i përket miliarderit kinez Richard Qiangdong Liu, themeluesi i kompanisë JD.com.
Sipas informacioneve të disponueshme, mjeti mban numrin IMO 9950686. Në bord, ai mund të akomodojë rreth 24 pasagjerë, të shërbyer nga një ekuipazh prej 45 anëtarësh. Ambientet e brendshme përfshijnë shërbime si pishinë, helipad, palestër, hapësira spa dhe kinema.
Mbërritja e këtij jahti vlerësohet si një mundësi për të ardhurat portuale. Pritet që Deep Blue të furnizohet me rreth 300 mijë litra karburant. Duke aplikuar taksën përkatëse prej 0.40 euro për litër për mjetet turistike detare, përfitimi për buxhetin e shtetit shqiptar parashikohet të jetë rreth 120 mijë euro. Përveç karburantit, prania e një mjeti të tillë gjeneron shpenzime për shërbime të ndryshme portuale dhe mbështetje logjistike gjatë kohës së qëndrimit në Durrës.
Përditësime
Autoritetet portuale sqaruan se qëndrimi i superjahtit Deep Blue ka karakter ekskluzivisht logjistik për furnizim me karburant. Mjeti luksoz, me gjatësi 134 metra, nuk do të zhvillojë asnjë vizitë turistike në qytetin e Durrësit.