Gjykata Supreme e Kosovës ka pranuar revizionin e Komunës së Prishtinës në kontestin për pronën në lagjen Bregu i Diellit, duke prishur vendimet e Gjykatës së Apelit dhe të Gjykatës Themelore në Prishtinë. Lënda i është kthyer gjykatës së shkallës së parë për rigjykim, pasi Supremja vlerësoi se nuk ishte sqaruar mjaftueshëm baza juridike për njohjen e pronësisë së banorëve.
Kontesti përfshin disa familje që kërkojnë njohjen e pronësisë mbi paluajtshmëri në lagje. Sipas pretendimeve të tyre, paraardhësit i kishin blerë pronat dhe i kishin shfrytëzuar që nga vitet 1967 dhe 1971. Gjykata Themelore, me aktgjykimin e 28 tetorit 2021, kishte refuzuar kërkesat e paditësve. Më pas, Gjykata e Apelit, me vendimin e 9 shtatorit 2024, ua kishte njohur pronësinë dhe kishte urdhëruar komunën t’i regjistronte si pronarë.
Sipas aktvendimit Rev.nr.124/2025, Supremja i prishi vendimet e Apelit dhe të shkallës së parë. Ajo vlerësoi se arsyetimi i Apelit ishte kontradiktor dhe nuk përcaktonte nëse pronësia pretendohej se ishte fituar përmes parashkrimit fitues, si pasojë e procedurave të shpronësimit apo mbi bazën e një titulli tjetër juridik. Gjykata kërkoi gjithashtu sqarime për statusin e pronës, legjitimitetin e palëve dhe mënyrën se si posedimi i paraardhësve mund të llogaritej në favor të pasardhësve.
Në rigjykim, Gjykata Themelore duhet të shqyrtojë edhe kërkesën e Mefail Cakollit për ndërhyrje në procedurë. Sipas Betimi për Drejtësi, më 2013 komuna kishte vendosur për këmbimin e pronës së Cakollit në Gërmi me pronë në Bregun e Diellit: mbi 16 ari në Gërmi me po aq sipërfaqe në Breg. Kontrata ishte nënshkruar më 2024. Ky burim raportoi gjithashtu se Prokuroria Themelore në Prishtinë kishte autorizuar Policinë e Kosovës të mblidhte informata pas hulumtimit të tij për këmbimin.
Pas publikimit të vendimit, kryetari i Prishtinës, Përparim Rama, tha se vendimi mbështet qëndrimin e komunës për mbrojtjen e pronës publike dhe deklaroi se prona i përket komunës. Banorët dhe disa grupe interesi ishin mbledhur disa herë pranë objektit të komunës gjatë pranverës, duke kërkuar tërheqjen e revizionit dhe zbatimin e vendimit të Apelit.