Shërbimi Korrektues i Kosovës ka njoftuar se ka suspenduar nga detyra zyrtarin korrektues Çlirim Shalën (Ç.SH.), të punësuar në Qendrën Korrektuese Dubravë.
Suspendimi erdhi pas pranimit të të dhënave nga Policia e Kosovës, sipas të cilave ai dyshohet se është përfshirë në një konflikt në Skenderaj, ku ka plagosur një person.
Në njoftimin zyrtar thuhet: "Shërbimi Korrektues i Kosovës njofton opinionin publik se, pas pranimit të informatave nga Policia e Kosovës se një zyrtar korrektues, me inicialet Ç.SH., i punësuar në Qendrën Korrektuese Dubravë, dyshohet të jetë përfshirë në një konflikt ku dyshohet se ka plagosur një person, institucioni ka ndërmarrë menjëherë veprimet e nevojshme. Në përputhje me legjislacionin dhe rregulloret në fuqi, zyrtari në fjalë është suspenduar nga detyra deri në përfundim të procedurave përkatëse."
Shërbimi Korrektues i Kosovës thekson se mbetet i përkushtuar për respektimin e ligjit dhe standardeve profesionale, si dhe do të bashkëpunojë ngushtë me institucionet kompetente për zbardhjen e plotë të rastit. Ngjarja u raportua më 10 mars 2026.