Deputetja e Partisë Demokratike, Jorida Tabaku, reagoi në 25 shkurt 2026 për situatën e rënduar në juglindje të Shqipërisë. Në një video të publikuar në rrjetet sociale, ajo e cilësoi izolimin e zonës si pasojë direkte e një politike infrastrukturore të dështuar dhe të kapur nga korrupsioni.
Sipas Tabakut, nga viti 2013 deri sot, Shqipëria ka shpenzuar rreth 3.8 miliardë euro për infrastrukturën rrugore dhe koncesionet, një kosto e marrë nga buxheti i shtetit dhe xhepat e qytetarëve. Ajo theksoi se që nga viti 2022, fondi vjetor për rrugët është dyfishuar, nga 200 milionë euro në 400 milionë euro në vit.
Megjithatë, rezultatet janë dramatikisht zhgënjyese: "Sot kemi rrugë të florinjta që po shkërmoqen". Me koston mesatare të Bashkimit Europian, sipas saj, do të ishte ndërtuar një autostradë 300 kilometra nga veriu në jug, që do t’i shërbente ekonomisë.
Tabaku e përshkroi strategjinë aktuale si "kosto e korrupsionit", të përqendruar në pak duar dhe me efekt shkatërrues për ekonominë. Pasojat përfshijnë bllokimin e gjysmës së territorit, fermerët që hedhin prodhimet dhe humbjet e bizneseve. "Kush mban përgjegjësinë që sot gjysma e vendit është e bllokuar? Jemi në situatë lufte pa qenë në luftë", u shpreh ajo.
Ajo theksoi impaktin ekonomik të drejtpërdrejtë te qytetarët dhe bizneset, duke e cilësuar dëmin si të parikuperueshëm. Në përfundim, Tabaku ngriti pyetjen nëse prioritet është interesi i qytetarëve apo i pushtetit dhe i "pak duarve që kanë kapur ekonominë".