Policia e Tiranës ka ndërhyrë në dy raste të ndara pas konflikteve fizike që kanë ndodhur për motive të dobëta, duke çuar në pranga tre shtetas dhe duke shpallur në kërkim një të katërt.
Në fshatin Zall-Herr, specialistët për Hetimin e Krimeve të Komisariatit të Policisë Nr. 5 arrestuan në flagrancë shtetasit A. T., 20 vjeç, dhe O. E., 21 vjeç. Ata dyshohet se kanë goditur me grushte dy shtetas. Autoritetet policore po vijojnë punën për të identifikuar dhe kapur persona të tjerë të përfshirë në këtë incident.
Në një rast të dytë, specialistët për Hetimin e Krimeve të Komisariatit të Policisë Nr. 6 arrestuan shtetasin O. Z., 37 vjeç, i cili dyshohet se ka goditur fizikisht dy persona në rrugën “Thoma Goxha”, në zonën e Kombinatit, duke u shkaktuar dëmtime. Në lidhje me këtë ngjarje, policia ka shpallur në kërkim shtetasin K. L., 33 vjeç, i dyshuar si i përfshirë në konflikt. Pamjet e këtij konflikti janë qarkulluar në rrjetet sociale, ndërsa materialet procedurale i janë referuar Prokurorisë për veprime të mëtejshme.