Një ngjarje e rëndë është shënuar mesditën e së dielës në fshatin Orizaj, në bashkinë Berat. Sipas të dhënave paraprake, 15-vjeçari Fatjon Sadushi ndodhej duke punuar në tokën bujqësore së bashku me të atin.
Në një moment pushimi, i mituri ka hyrë në lumin Osum për t'u freskuar dhe larë, por rrjedha e ujit e ka tërhequr disa metra larg. Babai i tij është futur menjëherë në lumë për t'i ardhur në ndihmë dhe ka arritur ta nxjerrë të birin në breg, por fatkeqësisht adoleshenti nuk kishte shenja jete.
Në vendngjarje kanë mbërritur shërbimet e Policisë së Beratit dhe autoambulanca, e cila e ka transportuar trupin e pajetë drejt morgut të Spitalit Rajonal të Beratit. Viktima do t'i nënshtrohet autopsisë mjeko-ligjore për të përcaktuar shkaqet e sakta të vdekjes.
Grupi hetimor është duke punuar për sqarimin dhe dokumentimin e plotë të rrethanave të ngjarjes. Burime zyrtare nga policia njoftuan se paraprakisht dyshohet që 15-vjeçari të jetë mbytur aksidentalisht gjatë kohës që po lahej në lumë.