Vala e protestave qytetare, e cila ka përfshirë disa qytete të Shqipërisë, është shtrirë së fundmi edhe në Tropojë. Për këtë të mërkurë, organizatorët kanë bërë thirrje për një tubim në orën 18:00, duke ftuar banorët të mblidhen përpara Muzeut të qytetit.
Në thirrjen drejtuar qytetarëve, kërkohet pjesëmarrja me flamuj dhe pankarta, me moton e protestës kundër padrejtësive të ndodhura gjatë 35 viteve të fundit. Organizatorët e vlerësojnë Tropojën si një zonë simbolike për zhvillimet demokratike në vend dhe e konsiderojnë këtë tubim si pjesë të një revolte më të gjerë qytetare.
Ndërkohë, lëvizja e protestave është shfaqur edhe në qytete të tjera si Saranda, Kukësi, Durrësi, Elbasani, Fieri dhe Korça, si dhe në diasporë. Kërkesat e protestuesve fokusohen në anulimin e projektit të Zvërnecit dhe dorëheqjen e kryeministrit Edi Rama. Në kryeqytet, për të njëjtën ditë, është parashikuar zhvillimi i protestës së 11-të mbarëkombëtare, e cila vijon të kërkojë ndryshime politike dhe largimin e qeverisë aktuale.