Trupi i pajetë i një personi, i cili u gjet të premten në zonën e grykëderdhjes së lumit Seman, vijon të mbetet i paidentifikuar. Për shkak të gjendjes së avancuar të dekompozimit, ekspertiza paraprake e kryer në morgun e qytetit të Fierit nuk ka arritur të përcaktojë identitetin e viktimës.
Sipas informacioneve nga Policia e Fierit, trupi i përket një mashkulli dhe gjatë kontrollit fillestar mjeko-ligjor nuk janë evidentuar shenja dhune. Mjekët ligjorë kanë vlerësuar se vdekja e viktimës mund të ketë ndodhur rreth dy muaj përpara datës së gjetjes së kufomës.
Për të vijuar me procedurat e identifikimit dhe përcaktimin e saktë të shkakut, kohës së vdekjes dhe moshës, trupi është transportuar drejt Institutit të Mjekësisë Ligjore në Tiranë. Atje pritet të kryhet analiza e ADN-së, e cila do të krahasohet me kampionet e familjarëve të personave të denoncuar si të zhdukur gjatë periudhave të fundit. Autoritetet po kryejnë verifikime për disa denoncime të kryera në Fier dhe qytete të tjera të vendit, në përpjekje për të zbardhur rrethanat e këtij rasti.