Kompania Frutex, një ndër eksportuesit më të mëdhenj në Kosovë, ka pritur sot një vizitë nga 25 ushtarë të aviacionit amerikan, pjesëtarë të misionit të KFOR-it. Vizita është dalluar për mënyrën e mbërritjes së ushtarëve, të cilët kanë ateruar në ambientet e kompanisë me dy helikopterë të tipit Black Hawk.
Gjatë qëndrimit në fabrikë, ushtarët amerikanë kanë vëzhguar proceset e prodhimit dhe janë njohur me arritjet e kompanisë, e cila operon me brendet Golden Eagle, Natural 100% dhe Relax. Pas vizitës në linjat e prodhimit, drejtuesit e kompanisë kanë organizuar një drekë të përbashkët me ushtarët, të cilët shërbejnë prej disa vitesh në misionin paqeruajtës në Kosovë.
Së fundmi, pjesëtarët e ushtrisë amerikane kanë vizituar edhe ambientet e dedikuara nga familja Palushi për ruajtjen dhe përkujtimin e historisë dhe sakrificës së popullit të Kosovës.