Familja e së ndjerës Liridona Ademaj ka reaguar pas publikimit të pamjeve të ndjeshme gjatë seancës gjyqësore, ku në sallë janë shfaqur fotografi që përfshijnë viktimën.
Leonard Ademaj, vëllai i saj, u ka bërë thirrje mediave dhe administratorëve të faqeve në rrjete sociale të mos i publikojnë ose shpërndajnë ato pamje. Ai thekson se materialet janë të rëndësishme vetëm për procesin gjyqësor dhe jo për publikun e gjerë.
Shpërndarja e tyre mund të shkaktojë pasoja të dhimbshme emocionale për familjen, sidomos për fëmijët e viktimës, të cilët mund t'i hasin ato në internet në të ardhmen. “Ne duam që fëmijët e saj ta mbajnë në mend nënën e tyre ashtu siç e kanë njohur kur ka qenë gjallë”, shkroi Leonard Ademaj.
Familja shpreh gjithashtu shpresën që Gjykata të marrë masa për të siguruar që materiale të tilla të përdoren vetëm brenda procesit gjyqësor dhe të mos bëhen publike.