Lëvizja qytetare që po proteston prej 10 ditësh përpara ndërtesës së Kryeministrisë ka ndërmarrë hapin e parë drejt një nisme ligjvënëse. Përfaqësuesit e kësaj lëvizjeje, nën logon Veprimi qytetar për demokraci funksionale, kanë dërguar një kërkesë zyrtare pranë Komisionit Qendror të Zgjedhjeve (KQZ) për të përfituar fletën tip të nevojshme për mbledhjen e firmave të zgjedhësve.
Në dokumentin e depozituar më 9 qershor 2026, janë listuar emrat e 10 përfaqësuesve të shoqërisë civile. Ndër firmat e spikatura në këtë kërkesë janë ato të ish-kreut të KQZ-së, Kristaq Kume, si dhe të aktivistëve Andi Tepelena dhe Edlira Çepani.
Në kërkesën drejtuar institucionit zgjedhor, organizatorët kanë saktësuar se periudha për mbledhjen e firmave do të jetë 3 muaj. Ky afat, sipas kërkuesve, do të llogaritet nga data në të cilën KQZ do të marrë vendimin për t'i pajisur ata me fletën standarde të kërkuar për procesin e nismës ligjvënëse.