Ngjarja ka ndodhur gjatë paradites së sotme në një rrugicë në zonën e Paskuqanit. Viktima, Ardian Baloshi, ishte duke ecur në këmbë së bashku me miqtë e tij kur një automjet në lëvizje është afruar pranë tyre. Nga mjeti, autori i dyshuar Sadik Llanaj ka hapur zjarr me armë automatike tip kallashnikov.
Sipas informacioneve, Ardian Baloshi ka marrë plagë të rënda në kokë dhe pavarësisht dërgimit të shpejtë në spital nga shokët e tij, ai ka mbërritur pa shenja jete. Dëshmitarët bënë të ditur se viktima dhe autori banonin në të njëjtën lagje dhe njiheshin me njëri-tjetrin, por nuk kanë pasur dijeni për ndonjë konflikt të mëparshëm mes tyre.
Pas sulmit, Sadik Llanaj është larguar me automjet në drejtim të paditur. Policia ka nisur punën për zbardhjen e rrethanave të ngjarjes, ndërsa operacioni për gjetjen e autorit po mbështetet nga forcat speciale RENEA, për shkak të rrezikshmërisë së lartë të të dyshuarit, i cili lëviz i armatosur.
Përditësime
Hetimet e Policisë së Shtetit kanë zbardhur detaje të reja mbi vrasjen në Paskuqan:
- Autori dhe viktima kanë pasur njohje dhe shoqëri të mëparshme.
- Autori e ka ndjekur viktimën për disa metra duke qëlluar ndaj tij në lëvizje.
- Ngjarja ka ndodhur në prani të nënës së viktimës, me të cilën ai bashkëjetonte.