Ish-diplomati amerikan William Walker, i cili dokumentoi Masakrën e Reçakut në vitin 1999, ka dënuar deklaratat e ministres serbe Snezana Paunović. Kjo e fundit pretendoi se, po të kishte qenë në vend të Sllobodan Millosheviqit, do të kishte ndërmarrë spastrim etnik në Kosovë që në vitin 1998.
Në një prononcim për Gazetën Express, Walker i ka cilësuar këto deklarata si ndër më ekstremet dhe fashistet që ka dëgjuar ndër vite. Ai theksoi se spastrimi etnik përbën krim lufte dhe se një retorikë e tillë ngre pikëpyetje serioze për racionalitetin dhe njerëzinë e ministres serbe.
“Nëse ajo thotë se do të kryente një krim lufte përpara Millosheviqit, atëherë çfarë të themi për të? Kjo e provon se edhe ajo është një kriminele lufte”, u shpreh Walker. Ai shtoi se gatishmëria për të kryer veprime të tilla dëshmon se Beogradi nuk ka reflektuar ende mbi krimet e kryera gjatë periudhës 1998–1999, duke përfunduar se shpreson që ministrja të mos ketë kurrë mundësi t'i zbatojë këto ide.