Gjykata Themelore në Prishtinë ka shpallur fajtor ish-shefin e prokurimit në Korporatën Energjetike të Kosovës (KEK), Ymer Dragusha, për katër vepra penale të keqpërdorimit të pozitës apo autoritetit zyrtar në bashkëkryerje. Dragusha është dënuar me një dënim unik prej dy vjetësh burgim, i cili duhet të ekzekutohet brenda 15 ditëve nga dita e plotfuqishmërisë së aktgjykimit.
Sipas vendimit të gjykatës, dënimi për pikën e parë të akuzës është caktuar në një vit burgim, ndërsa për tri pikat e tjera janë shqiptuar dënime prej nga tetë muaj për secilën. I dënuari është obliguar gjithashtu të paguajë 100 euro për paushallin gjyqësor dhe 100 euro për fondin e kompensimit të viktimave të krimit. Gjykata e ka udhëzuar Avokaturën Shtetërore që kërkesën pasurore juridike ta realizojë përmes procedurës së rregullt civile.
Ky dënim është pasojë e marrëveshjes për pranimin e fajësisë midis Dragushës dhe Prokurorisë Speciale, e cila u miratua nga gjykata në seancën e 7 shkurtit 2025. Ky rast është pjesë e dosjes më të gjerë të njohur si "KEK 2", ku përveç Dragushës, të akuzuar janë edhe ish-kryeshefi i KEK-ut, Nagip Krasniqi, dhe avokati Isuf Zejna. Të pandehurit akuzohen për vepra që dyshohet se i kanë shkaktuar buxhetit të Kosovës dëme prej mbi 36 milionë euro gjatë periudhës 2021-2023. Ndërsa Dragusha ka pranuar fajësinë, gjykimi ndaj Krasniqit dhe Zejnës vazhdon të jetë në proces.
Përditësime
Në rastin 'KEK 2', gjykatësi Rrahman Beqiri ka shpallur aktgjykimin, përmes të cilit i pandehuri Ymer Dragusha është dënuar me dy vjet burgim për korrupsion. Në të njëjtën seancë, trupi gjykues i ka dhënë Dragushës statusin e dëshmitarit bashkëpunues, ndërsa Isuf Zejna është paraqitur si përfaqësues ligjor i kompanisë 'Rexhepi Zeqiri Zejna L.L.C'.