Një anije tregtare, e cila besohet se është mbytur rreth 2,100 vjet më parë, është zbuluar pranë brigjeve të Turqisë. Gërmimet nënujore, të cilat kanë filluar në vitin 2025, kanë nxjerrë në dritë një ngarkesë të ruajtur në gjendje të mirë, përfshirë mijëra enë qeramike luksoze, vazo, pjata dhe tabaka. Rrënojat ndodhen rreth 55 metra nën sipërfaqen e detit, në afërsi të Adrasanit, në rajonin e Antalias.
Sipas studiuesve, anija ishte nisur nga vendbanimi i lashtë i Rusoit, në provincën e sotme Hatay, me destinacion Romën. Hipoteza kryesore sugjeron se anija goditi një zonë të cekët pasi u përfshi nga një stuhi, gjë që shkaktoi fundosjen e saj. Janë identifikuar 122 forma dhe madhësi të ndryshme enësh, të cilat pasqyrojnë kulturën ushqimore të shtresave të pasura të shoqërisë romake. Ndër gjetje figurojnë gjithashtu objekte nga ishuj të ndryshëm të Egjeut, çka tregon për një rrjet tregtar të zhvilluar në Mesdhe.
Një nga aspektet që ka lehtësuar ruajtjen e ngarkesës është mënyra e paketimit. Enët ishin sistemuar në arka druri, ku hapësirat ishin mbushur me argjilë, e cila pas fundosjes ka shërbyer si shtresë mbrojtëse natyrore. Rëndësia e këtij zbulimi përforcohet nga burimet historike; oratori romak Ciceroni, në një letër të vitit 50 para Krishtit drejtuar mikut të tij Atikus, përmendte një porosi për enë qeramike nga Rusoi, duke dëshmuar kërkesën për këto produkte. Datimi i anijes u përcaktua përmes monedhave të gjetura në vendngjarje, të cilat i përkasin shekullit I para Krishtit. Ministri Mehmet Nuri Ersoy vlerësoi se zbulimi ofron dëshmi të rëndësishme për traditën anadollake të prodhimit të qeramikës dhe për marrëdhëniet tregtare të asaj kohe.