Prokuroria pranë Gjykatës së Shkallës së Parë të Juridiksionit të Përgjithshëm Korçë koordinoi hetimet proaktive që çuan në zbulimin e një ambienti të fshehtë për kultivim dhe përpunim lëndësh narkotike në fshatin Vreshtas të Bashkisë Maliq. Në bashkëpunim me Drejtorinë Vendore të Policisë Korçë dhe Seksionin për Hetimin e Narkotikëve, autoritetet arrestuan shtetasin K.L., të dyshuar për veprën penale të prodhimit dhe shitjes së narkotikëve në bashkëpunim. Një person tjetër u shpall në kërkim për disa vepra penale.
Ambienti ndodhej nën një kotec shpendësh, me hyrje përmes një hapësire të improvizuar që çonte në një dhomë nëntokësore. Ai ishte organizuar profesionalisht, me mure të veshura me materiale termoizoluese për kontrollin e temperaturës dhe lagështirës. Përfshinte sisteme ventilimi, ndriçimi dhe ngrohjeje, llamba elektrike speciale, pajisje për rregullim temperature dhe lagështirie, tubacione ajri, si dhe sistem furnizimi me ujë për ujitje.
Brenda u gjetën zona për tharjen e bimëve narkotike cannabis sativa, me bimë të varura në struktura improvizuara, dhjetëra vazo me dhe dhe mbetje kërcelli bimësh të prera, së bashku me materiale ndihmëse për kultivim dhe përpunim.
Si prova materiale u sekuestruan rreth 5.4 kg lëndë e dyshuar narkotike cannabis sativa në proces tharjeje dhe të paketuar në doza të vogla, një sasi e vogël lëndë e dyshuar kokainë, peshore elektronike, sisteme ventilimi dhe ndriçimi, si dhe një armë në formë pistolete me bombol gazi të kompresuar. Gjithashtu, ambienti furnizohej me energji elektrike në mënyrë të paligjshme përmes lidhjes direkte me rrjetin e shpërndarjes.
Përditësime
Policia e Shtetit ka identifikuar të arrestuarin në Vreshtas të Maliqit si Klisman Leka, i dënuar më parë për vrasje me dashje.