Emisioni “Në Shënjestër” në News24 publikoi këtë të martë detaje të reja nga dosja hetimore për vrasjen e Enton Janushit, ngjarje e ndodhur më 19 janar 2015 në Shqipëri.
Sipas dëshmive të afërmve të tij, duke përfshirë e dashurën dhe prindërit, Enton Janushi, atëherë 29 vjeç, ishte larguar nga banesa pa lënë adresë. E dashura tentoi ta kontaktonte më 21 janar, por telefoni rezultoi i fikur. Ajo komunikoi me familjen, e cila nuk kishte dijeni për vendndodhjen e tij.
Policia Gjyqësore zbuloi se ai kishte emigruar në Itali, Francë, Belgjikë, Zvicër dhe Holandë, ku ishte përfshirë në aktivitete të paligjshme. Kjo konfirmohet nga shkresa e Zyrës Qëndrore Kombëtare të Interpol Tirana, sipas së cilës Enton (Taulant) Janushi (Maze), i lindur më 5 qershor 1986 në Elbasan dhe banues në Tiranë, shpallet në kërkim ndërkombëtar nga Interpol Haga. Zyra e prokurorit publik në Rotterdam lëshoi urdhër arresti më 19 shkurt 2015 për veprat penale plagosje me pasojë vdekje, vrasje dhe drogë, me dënim maksimal 30 vite burgim.
Sipas të dhënave të emisionit, ngjarja kriminale në Holandë, e cila ndodhi një ditë para kthimit të tij në Shqipëri, lidhet me vrasjen e vëllezërve Florenc dhe Glevis Tola nga Elbasani. Ata u gjetën të masakruar në një banesë në periferi të Rotterdamit.