Të enjten u zhvarrosën mbetje eshtërore në një lokacion afër Gjakovës, me dyshimin se i përkasin personave të zhdukur gjatë luftës së fundit. Kjo veprimtari u krye sipas urdhëresës së Departamentit Special të Gjykatës Themelore në Prishtinë.
Ditor Haliti, nga Instituti i Mjekësisë Ligjore, shpjegoi se zhvarrosja ishte planifikuar më parë dhe u ekzekutua nga ekipet e mjekësisë ligjore, bashkë me partnerët ndërkombëtarë nga EULEX, kolegët nga Policia e Kosovës dhe Komisioni Qeveritar për Persona të Zhdukur. Mbetjet janë dërguar në Institutin e Mjekësisë Ligjore për ekzaminime mjeko-ligjore, kryesisht për identifikimin e individit dhe, nëse është e mundur, përcaktimin e shkakut të vdekjes.
Haliti theksoi se ky proces ndihmon në verifikimin e identitetit dhe rrethanave të vdekjes. Ai njoftoi se punimet do të vazhdojnë në lokacione të tjera.
Lokacione të ardhshme për gërmime
Lokacioni i parë i planifikuar është Rahoveci, ku vitin e kaluar u gjetën mbetjet eshtërore të dy individëve. Pas tij, do të trajtohet një lokacion në Komunën e Klinës, me datë të pacaktuar ende.
Haliti sqaroi se Policia e Kosovës vazhdon hetimet, dhe sapo të ketë informata të reja, ato dërgohen në Prokurori. Prokuroria i drejton kërkesat në Gjykatë, e cila urdhëron gërmimet ose zhvarrosjet e nevojshme.