Një zjarr ka rënë mbrëmjen e sotme në zonën kodrinore të fshatit Radhimë, pranë hoteleve dhe strukturave turistike.
Flakët kanë përfshirë një godinë të ndërtuar me material drusor, e cila shërbente gjatë sezonit veror për aktivitete turistike në zonë.
Shkaqet e zjarrit ende nuk dihen. Paraprakisht dyshohet se mund të jetë shkaktuar nga një shkëndijë elektrike ose faktorë të tjerë aksidentalë, raporton gazetari Mikel Marsi nga Top Channel.
Në momentin e raportimit, objekti vazhdon të digjet, ndërsa flakët rrezikojnë të përhapen drejt hoteleve dhe ndërtesave të tjera pranë zonës së përfshirë.
Forcat zjarrfikëse janë nisur drejt vendngjarjes dhe po punojnë për izolimin e flakëve dhe vënien nën kontroll të situatës, me qëllim shmangien e dëmeve të tjera materiale dhe rrezikut për përhapjen te bizneset përreth.