Janë bërë 37 vjet nga demonstratat kundër suprimimit të autonomisë së Kosovës. Më 23 mars 1989, në Kuvendin e Kosovës u ndryshua Kushtetuta e vitit 1974, duke suprimuar autonominë e Kosovës në kuadër të ish-Federatës Jugosllave dhe duke e lënë provincën nën administrimin e Serbisë.
Parlamenti i Kosovës ishte i rrethuar me tanke dhe forca ushtarake. Nën shtetrrethim të ashpër, Serbia ia hoqi Kosovës autonominë. Nga 190 delegatë të pranishëm, disa prej tyre votuan kundër këtij ndryshimi, në mbrojtje të pozitës kushtetuese të Kosovës.
Para kësaj date, muaji shkurt i vitit 1989 u karakterizua nga greva e minatorëve të gjigantit Trepça, në mbrojtje të pozitës kushtetuese të Kosovës.
Në demonstratat kundër suprimimit të autonomisë, me kërkesa për krijimin e Republikës së Kosovës, ranë rreth 30 dëshmorë. Qindra persona u plagosën, ndërsa qindra të tjerë u arrestuan dhe u dënuan me burg.
Fushata kundër Kosovës kishte nisur më herët, në vitin 1987, nga qarqet politike serbe në Fushë Kosovë. Kjo periudhë shënon fillimin e lëvizjes serbe antishqiptare dhe ngritjen në pushtet të Slobodan Millosheviqit.