Një 62-vjeçar u arrestua në flagrancë në fshatin Kodras të Peqinit, pasi dyshohet se goditi me kosore fqinjin e tij, 52 vjeç, gjatë një konflikti për motive pronësie. Sipas Policisë, i dyshuari është shtetasi I. H., banues në Kodras, ndërsa i dëmtuari është A. D.
Shërbimet e Komisariatit të Policisë Peqin shkuan në vendngjarje pas marrjes së njoftimit se një person ishte goditur me kosore. Aty kapën të dyshuarin, i cili më pas u arrestua në flagrancë nga specialistët për Hetimin e Krimeve të Rënda ndaj Personit në Drejtorinë Vendore të Policisë Elbasan.
Sipas hetimeve paraprake, I. H. dyshohet se tentoi të vriste fqinjin për shkak të një mosmarrëveshjeje për pronën. Ai akuzohet për veprën penale “Vrasja me dashje”, e mbetur në tentativë.
A. D. është transportuar për trajtim mjekësor dhe ndodhet nën kujdesin e mjekëve në Spitalin e Traumës në Tiranë. Materialet procedurale iu referuan Prokurorisë për veprime të mëtejshme hetimore.