Ylli Dine, 65 vjeç, banues në fshatin Mezhgoran të Tepelenës, është shpallur i humbur prej familjarëve të tij. Ngjarja ka ndodhur më 3 shkurt 2026, kur ai është larguar nga banesa për të ruajtur bagëtitë.
Sipas kallëzimit të bërë në Komisariatin e Policisë Tepelenë, vëllai i tij, shtetasi A. D., ka deklaruar se familjarët kanë humbur kontaktet me të menjëherë pas largimit. Policia ka nisur menjëherë kërkimet në terren për gjetjen e 65-vjeçarit.
Familjarët kanë shprehur shqetësimin se Ylli Dine mund të ketë pësuar një problem shëndetësor ose të jetë marrë nga rrjedha e lumit në zonë. Ata nuk kanë informacion nëse ka ndodhur diçka e tillë.
Në njoftimin zyrtar të Policisë së Gjirokastrës, konfirmohet se operacioni i kërkimit po vazhdon intensivisht në fshatin Mezhgoran dhe rrethinat.