Një aksident i rëndë trafiku ka ndodhur gjatë ditës së sotme në fshatin Shushicë të komunës së Istogut, duke shkaktuar vdekjen e dy personave, ndër të cilët edhe një fëmijë.
Kryetari i Komunës së Istogut, Ilir Ferati, përmes një njoftimi ka shprehur ngushëllimet më të sinqerta për familjen Qorraj. Ai e ka cilësuar këtë ngjarje si një fatkeqësi që ka tronditur gjithë qytetin. Përveç viktimave, në aksident kanë mbetur edhe persona të tjerë të lënduar, për të cilët kryetari Ferati ka uruar shërim sa më të shpejtë.
Në reagimin e tij, kryetari i Istogut ka apeluar tek të gjithë drejtuesit e automjeteve që të tregojnë kujdes maksimal gjatë vozitjes. Ai ka theksuar se siguria në rrugë duhet të jetë prioritet, duke shtuar se thirrja për kujdes është edhe më e domosdoshme në kushte të pafavorshme atmosferike.