Një aksident rrugor me pasojë vdekjen u regjistrua pasditen e datës 3 gusht 2026 në zonën e Ksamilit. Shtetasi Antonio Mateli, rreth 20 vjeç dhe banues në Ksamil, ishte duke drejtuar një furgon mallrash kur mjeti doli nga rruga në vendin e njohur si “Pema e Thatë”.
Sipas informacioneve paraprake, drejtuesi i mjetit ka pësuar lëndime të rënda gjatë aksidentit. Ai u transportua me urgjencë drejt spitalit, por nuk ka mundur t’u mbijetojë plagëve të marra, duke ndërruar jetë gjatë rrugës.
Në vendngjarje kanë mbërritur forca të shumta të Policisë dhe grupi hetimor, të cilët kanë nisur kryerjen e veprimeve të nevojshme për dokumentimin e dinamikës dhe shkaqeve që çuan në daljen e mjetit nga rruga. Autoritetet vijojnë punën për zbardhjen e plotë të kësaj ngjarjeje, ndërsa ende nuk janë bërë të ditura detaje shtesë mbi rrethanat konkrete të aksidentit.
Përditësime
Policia ka sqaruar dinamikën e aksidentit të ndodhur rreth orës 18:10 në rrugën e Plazhit, në zonën e Lagunës. Viktima, Antonio Mateli, 20 vjeç, ishte pasagjer në automjetin tip Benz, i cili drejtohej nga 22-vjeçari A. Gj.. Drejtuesi i mjetit ndodhet në spital, jashtë rrezikut për jetën, ndërsa policia saktëson se mjeti ishte automjet vetjak dhe jo furgon mallrash siç u raportua fillimisht.
Hetimet për aksidentin tragjik në Ksamil kanë zbardhur dinamikën e ngjarjes, duke konfirmuar se mjeti tip Benz doli nga rruga dhe u përmbys. Viktima është identifikuar si Antonio Mateli, 20 vjeç. Ceremonia mortore do të mbahet nesër, në orën 12:00, në Sarandë.