Prokuroria Speciale e Republikës së Kosovës ka dorëzuar në Gjykatën Themelore në Prishtinë një aktakuzë ndaj gjashtë shtetasve për përfshirje në veprimtari kriminale ndërkombëtare. Sipas aktakuzës, pesë prej të pandehurve, përkatësisht B.D., A.D., L.D., G.D. dhe E.D., akuzohen për “Pjesëmarrjen ose organizimin e grupit kriminal të organizuar”, në lidhje me veprat penale “Mashtrimi” dhe “Hyrja e paautorizuar në sistemet kompjuterike”. I pandehuri i gjashtë, B.C., ngarkohet veçmas për veprën penale të “Mashtrimit”.
Hetimet tregojnë se grupi ka vepruar nga territori i Kosovës gjatë viteve 2022–2024, duke shënjestruar shtetas të Republikës Federale të Gjermanisë. Veprimtaria është realizuar përmes qendrave të thirrjeve dhe përdorimit të teknologjisë VoIP, duke maskuar numrat telefonikë. Të pandehurit dyshohet se janë paraqitur si punonjës bankash ose zyrtarë policorë për të siguruar të dhëna të ndjeshme bankare dhe personale nga viktimat.
Sipas të dhënave të siguruara, dëmi financiar i shkaktuar nga grupi i parë prej pesë personash llogaritet në 211,690 euro, ndërsa për të pandehurin B.C. dëmi i pretenduar është 149,475.04 euro, duke e çuar dëmin total në mbi 361 mijë euro. Ky rast është hetuar në bashkëpunim të ngushtë me autoritetet gjermane përmes mekanizmave të bashkëpunimit juridik ndërkombëtar.