Inspektorët e Drejtorisë Rajonale të Autoritetit Kombëtar të Ushqimit (AKU) në Korçë zhvilluan më 23 prill 2026 inspektime në dy subjekte ushqimore në qytetin e Korçës. Kontrollet u kryen në një stabiliment të përpunimit të qumështit dhe nënprodukteve të tij, si dhe në një stabiliment të përpunimit të mishit të pulës.
Ky proces u mbikëqyr nga një ekip i Inspektoratit të Përgjithshëm, me iniciativë të Inspektorit të Përgjithshëm Dashnor Sula. Inspektorati verifikoi ndjekjen e procedurave ligjore, sjelljen korrekte dhe profesionale të inspektorëve të AKU-së, dokumentimin e plotë të çdo hapi, si dhe autorizimin e inspektimit me dokumentacionin shoqërues.
Inspektimet rastësore të paralajmëruara u zhvilluan në kuadër të transparencës me publikun dhe në zbatim të ligjit nr. 99/2024 "Për inspektimin në Republikën e Shqipërisë". Mbikëqyrja u përqendrua gjithashtu te përdorimi i mjeteve dhe pajisjeve të punës sipas standardeve, duke përfshirë:
- mjetet e identifikimit zyrtar;
- formularët dhe aktet e nevojshme;
- pajisjet për regjistrimin dhe raportimin e të dhënave, përfshirë ato digjitale;
- pajisjet mbrojtëse, sipas natyrës së kontrollit.
Të gjitha gjetjet dhe vlerësimet do të pasqyrohen në raportin e Inspektoratit të Përgjithshëm mbi performancën e trupës inspektuese. Ky raport shërben për analizë, përmirësim të standardeve dhe rritje të llogaridhënies. Inspektorati mbikëqyr vetëm trupën inspektuese dhe procesin e inspektimit, për të garantuar integritetin, ligjshmërinë dhe zbatimin e njëtrajtshëm të standardeve, me qëllim forcimin e besimit publik.