Policia e Durrësit finalizoi operacionin policor të koduar “Storm 17”, pas një hetimi katërjavor me metoda speciale të gjurmimit, për veprat penale të prostitucionit dhe përshtatjes së ambienteve për prostitucion.
Në flagrancë u arrestuan shtetaset kineze X. Ch., 48 vjeçe, J. L., 36 vjeçe, Y. L., 48 vjeçe dhe L. Sh., 53 vjeçe. Ato kishin marrë me qira dy apartamente në zonat turistike të Golemit dhe Shkëmbit të Kavajës, duke i përshtatur për ushtrimin e aktivitetit të paligjshëm.
Gjithashtu, në gjendje të lirë u proceduan katër shtetas për prostitucion: nga Durrësi, Kavaja, Shijaku dhe Kosova.
Si prova materiale u sekuestruan 4 pasaporta dhe një shumë parash. Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
Operacionin e zhvilluan Specialistët për Hetimin e Trafiqeve në bashkëpunim me Forcat e Posaçme Operacionale.