Shërbimet e Stacionit të Policisë Poliçan zhvilluan një operacion për goditjen e kultivimit të bimëve narkotike në territorin e qarkut Berat. Si rezultat i hetimeve proaktive, në fshatin Zgërbonjë, policia gjeti 107 bimë të dyshuara si Cannabis sativa dhe 20 kubikë me fidanë të këtij lloji.
Si autor i dyshuar i kësaj veprimtarie kriminale u identifikua dhe u arrestua shtetasi me inicialet R. I., 38 vjeç, banues në Poliçan. Pas dokumentimit të rastit, bimët narkotike dhe fidanët janë asgjësuar nga forcat e policisë në vendngjarje, përmes djegies. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat për veprime të mëtejshme hetimore.
Autoritetet njoftuan se kontrollet antikanabis do të vijojnë në të gjithë qarkun e Beratit, me synim parandalimin dhe goditjen e kultivimit të paligjshëm të lëndëve narkotike, në kuadër të operacioneve për ruajtjen e rendit publik.