Strukturat e Komisariatit të Policisë Has, në bashkëpunim me specialistët për Hetimin e Krimeve Ekonomike dhe Financiare në DVP Kukës, arrestuan në flagrancë shtetasin G. R., 58 vjeç, banues në Krumë.
Ndërhyrja u bë në vijim të kontrolleve të bazuara në informacionet operative, për evidentimin e subjekteve të përfshira në organizimin e paligjshëm të lojërave të fatit.
Sipas hetimeve paraprake, i arrestuari organizonte lojëra fati në ambientet e lokalit të tij, duke përdorur celularë.
Gjatë kontrollit, policia sekuestroi në cilësinë e provës materiale një celular, skedina dhe një sasi parash të dyshuara si të përfituara nga kjo veprimtari.
Materialet procedurale i janë referuar Prokurorisë së Kukësit për veprime të mëtejshme.
Autoritetet njoftojnë se kontrollet për goditjen e lojërave të fatit të paligjshme do të vazhdojnë në ditët në vijim.