Autoriteti Rrugor Shqiptar (ARRSH) ka reaguar zyrtarisht lidhur me shqetësimet për mungesën e një hyrje-daljeje në zonën e Paprit, përgjatë autostradës së re Elbasan-Rrogozhinë. Nëpërmjet një njoftimi për publikun, institucioni sqaroi se projekti i kësaj vepre infrastrukturore parashikon ndërtimin e një nyjeje lidhëse në këtë zonë, e cila do të shërbejë për komunikimin e qytetarëve të Paprit, Cërrikut dhe zonave të tjera përreth me autostradën.
Sipas ARRSH-së, ndërtimi i kësaj nyjeje nuk bën pjesë në kontratat që janë aktualisht në proces zbatimi. Institucioni theksoi se vepra është planifikuar të realizohet në një fazë të mëtejshme, në përputhje me planifikimin e përgjithshëm dhe vijimësinë e punimeve për këtë investim.
Ky reagim vjen pas interesimit të medias dhe publikut për mungesën e një aksesi të drejtpërdrejtë në këtë zonë. ARRSH nënvizoi se mbetet e përkushtuar për të informuar në mënyrë të vazhdueshme dhe transparente qytetarët mbi ecurinë e punimeve, duke u kërkuar palëve të referohen te njoftimet zyrtare për të dhëna të sakta mbi infrastrukturën.