Me paralajmërimin se temperaturat gjatë ditëve në vijim pritet të arrijnë deri në 40 gradë Celsius, Agjencia e Ushqimit dhe Veterinarisë (AUV) ka bërë thirrje për kujdes të shtuar në trajtimin, ruajtjen dhe përgatitjen e ushqimeve. Temperaturat e larta krijojnë kushte të përshtatshme për shumimin e baktereve, duke rritur ndjeshëm rrezikun e helmimeve ushqimore.
Këshilla për konsumatorët gjatë blerjes dhe ruajtjes
Për të minimizuar rreziqet, AUV këshillon qytetarët të ndjekin këto udhëzime:
- Blerja e produkteve ushqimore duhet të bëhet vetëm në pika të verifikuara të shitjes, ku produktet, veçanërisht ato me origjinë shtazore, ruhen në frigoriferë.
- Shmangni blerjen e produkteve me ambalazh të dëmtuar, të rrudhosur, të fryrë ose të çarë.
- Produktet e ftohta dhe të ngrira duhet të merren në fund të procesit të blerjes për të ruajtur zinxhirin e ftohtë.
- Ushqimet që prishen shpejt, si mishi, qumështi dhe vezët, nuk duhet të lihen për kohë të gjatë në automjete ose të ekspozohen ndaj nxehtësisë.
- Ushqimet e ftohta duhet të ruhen në temperaturë nën 5 gradë Celsius, ndërsa ato që gatuhen duhet të përpunohen termikisht në temperaturë mbi 60 gradë Celsius.
- Frutat dhe perimet duhet të lahen mirë me ujë të rrjedhshëm.
- Pas përgatitjes, ushqimi duhet të ftohet dhe të ruhet në frigorifer, duke vendosur ushqimet e gatuara në raftet e sipërme dhe ato të papërpunuara në raftet e poshtme për të shmangur ndotjen e ndërsjellë.
Kujdesi në objektet hotelierike dhe ndaj kafshëve
Në rastet kur konsumoni ushqim jashtë shtëpisë, AUV sugjeron përzgjedhjen e operatorëve që respektojnë standardet e higjienës dhe kanë reputacion të mirë. Në lokalet e ushqimit të shpejtë, qytetarët duhet të shmangin shtesat si majoneza, keçapi, sallatat me krem apo salcat e ndryshme, nëse ato nuk mbahen në kushte frigoriferike. Nëse dyshoni për sigurinë e një produkti, mos e konsumoni atë.
Një tjetër shqetësim i ngritur nga AUV është ndikimi i të nxehtit te kafshët. Pronarët duhet të sigurojnë sasi të mjaftueshme të ujit të freskët dhe ushqimit të sigurt, duke shmangur ekspozimin e kafshëve ndaj temperaturave ekstreme, për të parandaluar rreziqet shëndetësore ndaj tyre.
Përditësime
Drejtoria për Punë Hidrometeorologjike (DPHM) njofton se vala e të nxehtit do të vazhdojë deri në fund të javës së ardhshme. Duke filluar nga e mërkura, temperaturat pritet të kalojnë pragun e 40 gradë Celsius. Në këtë kontekst, Agjencia e Ushqimit dhe Veterinarisë (AUV) paralajmëron rrezikun e shtuar të helmimeve ushqimore dhe u bën thirrje qytetarëve për kujdes të shtuar gjatë periudhës me temperatura ekstreme.