Agjencia e Ushqimit dhe Veterinarisë (AUV) u ka bërë thirrje të gjithë operatorëve ekonomikë, përfshirë prodhuesit, përpunuesit, shpërndarësit dhe tregtarët, që të zbatojnë me përpikëri kërkesat ligjore dhe standardet e sigurisë ushqimore. Apeli përfshin sektorin e gastronomisë si restorantet, hotelet, sallat e dasmave, marketet, furrat, qebaptoret dhe fast-food-et.
Sipas AUV-it, për shkak të temperaturave të larta gjatë sezonit veror, është e domosdoshme që produktet të ruhen në temperaturat e përcaktuara në etiketa, si dhe pajisjet ftohëse dhe ngrirëse të kontrollohen rregullisht. Agjencia thekson se produktet me prejardhje shtazore janë më të ndjeshmet, megjithatë kujdesi duhet shtrirë në të gjitha artikujt që kërkojnë kushte specifike të ruajtjes.
Thirrja u drejtohet edhe qytetarëve, të cilët këshillohen të tregojnë kujdes gjatë blerjes, transportit dhe ruajtjes së ushqimeve deri në momentin e konsumit. AUV-i ka bërë të ditur se, për të garantuar shëndetin publik dhe për të parandaluar helmimet ushqimore, do të intensifikojë kontrollet në të gjithë vendin gjatë muajve të verës, ku nuk do të tolerohet asnjë shkelje e kërkesave ligjore.