Prokuroria pranë Gjykatës së Shkallës së Parë të Juridiksionit të Përgjithshëm Berat ka njoftuar përfundimin e një hetimi proaktiv gjashtëmujor, i cili ka rezultuar në procedimin penal të 11 shtetasve. Të hetuarit janë identifikuar me inicialet: S.T., H.S., M.M., S.H., S.C., A.H., A.S., O.V., Z.M., E.T. dhe K.P.
Sipas organit të akuzës, të dyshuarit, në rolin e administratorëve dhe punonjësve të gjashtë subjekteve tregtare, kanë ushtruar aktivitet këmbimi valutor pa autorizimin përkatës. Megjithëse këto subjekte ishin të regjistruara si agjentë për transferta parash (në emër të institucioneve financiare jo-banka si Unionnet dhe Western Union), ato nuk figuronin në listën e zyrave të licencuara nga Banka e Shqipërisë për të kryer kembim valutor.
Në kuadër të procedimit penal nr. 47, prokuroria autorizoi veprime të simuluara, duke realizuar 28 transaksione të fshehta që shërbyen si prova të aktivitetit të paligjshëm. Gjatë kontrolleve në këto subjekte, të cilat shtrihen në pesë bashki të qarkut të Beratit, u sekuestruan sasi të konsiderueshme monetare:
- 88 milionë lekë
- 118 mijë euro
- 7390 dollarë
- 665 paund
Për personat nën hetim, prokuroria ka kërkuar nga gjykata vendosjen e masave të sigurimit "arrest në shtëpi" dhe "detyrim për t’u paraqitur në policinë gjyqësore".