Në javën e parë të korrikut, një zjarr masiv përfshiu venddepozitimin e mbetjeve në periferi të Elbasanit, duke mbuluar qiellin me tym të dendur. Matjet e organizatave mjedisore treguan përhapje të sasive të mëdha dioksidi karboni, metani dhe dioksidi azoti, që tejkaluan normat e lejuara.
Shqipëria është e detyruar nga direktivat e Bashkimit Europian dhe legjislacioni vendor të monitorojë cilësinë e ajrit dhe ndikimin e ndotjes në shëndetin e popullatës. Megjithatë, të dhënat e siguruara nga BIRN përmes kërkesave për të drejtë informimi dhe intervistave me ekspertë tregojnë se qytetet kryesore nuk disponojnë mjete për prodhimin e të dhënave të besueshme mbi cilësinë e ajrit.
Agjencia Kombëtare e Mjedisit nuk publikon këto të dhëna në kohë reale. Pa të dhëna mbi sasinë e grimcave të rrezikshme, reagimi ndaj shkaqeve të ndotjes mbetet i kufizuar, ndërsa ndotja lidhet me probleme shëndetësore në rritje.
Imeldi Sokoli, eksperte mjedisi, shpjegoi: «Sjellin probleme në aparatin respirator, probleme të frymëmarrjes, rritje të rrezikut për sëmundje kardiovaskulare, lodhje, irritime dhe ndikim afatgjatë në shëndet, alergji, kollë dhe shqetësime, sidomos tek fëmijët dhe të moshuarit».
Bashkia e Elbasanit i tha BIRN-it se, megjithë ngritjen e një inspektorati të dedikuar për mjedisin, ky inspektorat nuk disponon logjistikën e duhur për monitorime në ajër, ujë dhe tokë. Ai vepron duke konstatuar shkeljet vetëm nga ana vizuale në terren, për të gjithë subjektet që operojnë në territorin e bashkisë.