Kompania MABCO Constructions SA ka ndërmarrë hapa ligjorë pas një vendimi të ri gjyqësor që bllokon ndryshimin e administratorit të shoqërisë koncesionare VIA, e cila menaxhon ndërtimin e Aeroportit të Vlorës. Më 6 qershor, gjyqtarja Miranda Naka mori një vendim që pezulloi efektet e një vendimi të Gjykatës së Lartë të datës 26 maj, i cili i kishte rikthyer MABCO-s të drejtat e votës si ortake mazhoritare me 98% të kuotave.
Sipas njoftimit të kompanisë, vendimi u mor pa praninë e palëve, vetëm 24 orë përpara mbledhjes së ortakëve ku synohej zëvendësimi i administratorit të emëruar nga ortaku minoritar, Valon Ademi, i cili zotëron 2% të kuotave. MABCO e cilëson vendimin si kontradiktor dhe në kundërshtim me dispozitivin e Gjykatës së Lartë, duke paralajmëruar se do të kundërshtojë çdo veprim kontraktual të kryer pa miratimin e saj.
Në reagimin e saj, kompania ka njoftuar Presidentin e Republikës, krerët e partive politike, grupet parlamentare dhe trupin diplomatik lidhur me situatën. MABCO pretendon se kantieri është bllokuar në bashkëpunim me struktura të caktuara dhe se institucionet shtetërore kanë dështuar në garantimin e sigurisë juridike për këtë investim. Paralelisht, Ministria e Infrastrukturës dhe Energjisë, përmes ministrit Enea Karakaçi, u ka kërkuar më herët ortakëve që të zgjidhin mosmarrëveshjet dhe të vijojnë punimet. Kompania e kundërshton këtë qasje, duke e cilësuar si mosadresim të problemit real dhe duke ngritur dyshime për koordinim mes institucioneve dhe gjyqësorit për cenimin e investimit të saj.